हाम्रो मिशन

दृष्टिकोण

नेपालमा कीटजन्य रोगहरू (Vector Borne Diseases), उपेक्षित उष्ण प्रादेशिक रोगहरू (Neglected Tropical Diseases), जनावरबाट सर्ने रोगहरू (Zoonotic Diseases) तथा उदीयमान संक्रामक रोगहरू (Emerging Infectious Diseases) को रोकथाम, नियन्त्रण तथा उन्मूलनका लागि सर्भिलेन्स, अत्याधुनिक अनुसन्धान, क्षमता विकास तथा नवीनतम नीतिगत मार्गदर्शनमा नेतृत्वदायी भूमिका निर्वाह गर्ने विश्वस्तरीय उत्कृष्टता केन्द्र (Global Center of Excellence) तथा राष्ट्रिय स्रोत केन्द्र (National Resource Center) का रूपमा क्रमश विकास हुने यस केन्द्रको दृष्टिकोण रहेको छ।

उद्देश्यहरू

जनस्वास्थ्य प्रणाली सुदृढीकरण: जलवायु परिवर्तन, प्रतिजैविक प्रतिरोध, अस्वस्थ पारिस्थितिक प्रणाली, अव्यवस्थित शहरीकरण जस्ता चुनौतीहरूबाट उत्पन्न हुने  रोगजन्य गतिशीलता (Disease Dynamics) लाई सम्बोधन गर्न evidence-based स्वास्थ्य प्रणालीलाई थप सुदृढ र सक्षम बनाउने। एक स्वास्थ्य अवधारणा (One Health Approach) को प्रयोग: मानव, पशु तथा वातावरणबीचको अन्तरसम्बन्ध र असन्तुलनबाट उत्पन्न हुने रोगहरूको रोकथाम, नियन्त्रण तथा व्यवस्थापनका लागि एक स्वास्थ्य अवधारणामा आधारित अनुसन्धान र क्षमता विकासका कार्यहरु गर्ने। उच्च-गुणस्तरीय अनुसन्धान: नवीनतम अनुसन्धानका विधि तथा प्रविधिको प्रयोगमार्फत विश्वसनीय, वैज्ञानिक तथा प्रमाणमा आधारित ज्ञान विकास गर्ने र प्राप्त प्रमाणका आधारमा प्रभावकारी जनस्वास्थ्य सेवा तथा कार्यक्रमहरुको सञ्चालनमा योगदान पुर्‍याउने। रोग भार/आर्थिक भार न्यूनीकरण: कीटजन्य रोगहरू (VBDs), उपेक्षित उष्ण प्रादेशिक रोगहरू (NTDs), जनावरबाट सर्ने रोगहरू (Zoonotic diseases), तथा उदीयमान संक्रामक रोगहरू (Emerging Infectious Diseases- EIDs) बाट उत्पन्न हुने रोगको भार तथा आर्थिक भारलाई घटाउन अनुसन्धानका कार्यहरु गर्ने तथा तालिम प्रदान गर्ने । राष्ट्रिय लक्ष्यमा योगदान: औलो निवारण (Malaria Elimination), कालाजार निवारण (Kala-azar Elimination), हात्तीपाइले  निवारण (Filariasis Elimination), स्क्रब टाइफस नियन्त्रण (Scrub Typhus Control), डेंगु नियन्त्रण (Dengue Control) तथा जापानीज इन्सेफ्लाइटिस नियन्त्रण (Japanese Encephalitis Control) जस्ता राष्ट्रिय लक्ष्य प्राप्ति गर्ने एवं प्रभावकारी जनस्वास्थ्यका कार्यक्रम मार्फत "सुखी नेपाली, समृद्ध नेपाल" को राष्ट्रिय लक्ष्य हासिल गर्न अनुसन्धान एवम तालिम प्रदान गर्ने ।

लक्ष्य

नेपालको स्वास्थ्य क्षेत्रको प्रमुख प्राविधिक केन्द्रको रूपमा VBDRTC लाई पुनर्स्थापित तथा सुदृढ गर्दै, कीटजन्य रोग (VBDs) र उदीयमान संक्रामक रोग (EIDs) बाट उत्पन्न हुने दोहोरो चुनौतीलाई प्रभावकारी रूपमा सम्बोधन गर्न सक्षम बनाउने, साथै कीटनाशक प्रतिरोध (Insecticide Resistance) तथा प्रतिजैविक प्रतिरोध (AMR) जस्ता बढ्दो चुनौतीहरूको सामना गर्न अनुसन्धान, प्रविधि र प्राविधिक क्षमतालाई सुदृढ गर्ने।  

ध्येय

जलवायु परिवर्तन, मानव स्वास्थ्य, पशु स्वास्थ्य तथा वातावरणीय पारिस्थितिक प्रणाली र रोगजन्य गतिशीलता बीचको अन्तरसम्बन्धका विषयमा उच्चस्तरीय वैज्ञानिक प्रमाणहरू विकास गर्दै, एक स्वास्थ्य अवधारणा (One Health Approach) मार्फत जनस्वास्थ्यको संरक्षण गर्ने।साथै, वैज्ञानिक अनुसन्धान तथा आधुनिक प्रविधिबाट प्राप्त ठोस प्रमाणका आधारमा राष्ट्रिय स्वास्थ्य नीति निर्माण प्रक्रियालाई सुदृढ गर्ने।